Trosolwg o'r swydd

Ymunwch â’n tîm Therapi Galwedigaethol yn Ysbyty Cyffredinol Glangwili, Caerfyrddin, yn rôl Arweinydd Clinigol ar gyfer y Gwasanaethau Meddygol ac Eiddilwch. Mae hwn yn gyfle gwych i Therapydd Galwedigaethol profiadol gyfuno ymarfer clinigol uwch ag arweinyddiaeth, gan ddylanwadu ar ddatblygiad gwasanaethau sy’n gwneud gwahaniaeth gwirioneddol i gleifion ar draws y llwybrau acíwt a chymunedol.

Byddwch yn gweithio gyda phobl sy’n profi amrywiaeth o gyflyrau, gan gynnwys salwch anadlol a chardiaidd, eiddilwch, ac anafiadau trawmatig i’r ymennydd, a hynny’n rhan o lwybr y rhwydwaith trawma. Gyda chefnogaeth tîm cyfeillgar a chydweithredol, byddwch yn chwarae rhan allweddol wrth ddarparu gofal o ansawdd uchel sy’n canolbwyntio ar yr unigolyn gan hyrwyddo dull “gartref yn gyntaf”.

A chithau’n Arweinydd Clinigol, byddwch yn darparu arweiniad a chymorth proffesiynol i dîm medrus o Therapyddion Galwedigaethol  Staff Cymorth Therapi Galwedigaethol. Ochr yn ochr â’ch profiad clinigol, byddwch yn cyfrannu at ddatblygu’r gwasanaeth, mentrau gwella ansawdd, llesiant y gweithlu, a datblygiad proffesiynol, gan helpu’r tîm i barhau i ddarparu gofal eithriadol.

Gan weithio’n agos gyda’r tîm amlddisgyblaethol ehangach, gwasanaethau gofal canolraddol, partneriaid cymunedol a’r trydydd sector, byddwch yn helpu i sicrhau bod cleifion yn cael y cymorth cywir, yn y lle cywir ar yr adeg gywir.

Prif ddyletswyddau'r swydd

A chithau’n Therapydd Galwedigaethol profiadol, byddwch yn cynnig cefndir clinigol cryf ym maes adsefydlu pobl hŷn, codi a chario cymhleth, a dealltwriaeth o’r heriau a’r cyfleoedd sy’n wynebu’r gwasanaethau acíwt, gofal canolraddol a chymunedol.

Byddwch yn hyderus i weithio’n annibynnol gan hefyd ddarparu arweinyddiaeth glinigol a rheolaethol mewn amgylchedd amlddisgyblaethol cefnogol. Mae’r cyfrifoldebau allweddol yn cynnwys y canlynol:

• Darparu arweinyddiaeth glinigol, a chyngor a goruchwyliaeth arbenigol i Therapyddion Galwedigaethol, Ymarferwyr Cynorthwyol Therapïau, Cynorthwywyr Adsefydlu/Gweithwyr Cymorth Eiddilwch a myfyrwyr.
• Cefnogi datblygiad y gwasanaeth a gwelliant parhaus trwy archwiliadau, mentrau effeithiolrwydd clinigol a gweithgarwch ymchwil.
• Meithrin perthnasoedd cadarn â’r gwasanaethau acíwt a chymunedol a sefydliadau partner i helpu i ddarparu gofal ymatebol, di-dor ar draws llwybrau’r gwasanaeth.
• Hyrwyddo rhagoriaeth mewn gofal cleifion trwy ymarfer seiliedig ar dystiolaeth, arloesi a datblygu tîm effeithiol.
• Cefnogi llesiant staff, twf proffesiynol a datblygiad parhaus y gwasanaeth Therapi Galwedigaethol

Rydym yn chwilio am unigolyn blaengar a llawn cymhelliant sy’n meddu ar sgiliau cyfathrebu a rhyngbersonol rhagorol, galluoedd cadarn o ran trefnu, ac ymrwymiad i ddarparu gofal o ansawdd uchel sy’n canolbwyntio ar y claf.

Gweithio i'n sefydliad

Mae Bwrdd Iechyd Prifysgol Hywel Dda yn darparu gwasanaethau gofal iechyd GIG i bobl sy’n byw yn Sir Gâr, Sir Benfro a Cheredigion, a siroedd sy’n ffinio.

Mae gennym dros 13,000 o staff a gyda’n gilydd rydym yn darparu gwasanaethau cynradd, cymuned, yn yr ysbyty, iechyd meddwl ac anghenion dysgu.

Gweithiwn mewn partneriaeth gyda’r tri awdurdod lleol, yn ogystal â chydweithwyr cyhoeddus, preifat a trydydd sector, a hefyd ein tîm o wirfoddolwyr gwerthfawr.

Darperir ein gwasanaethau yn:

• Pedwar prif ysbyty: Ysbyty Bronglais yn Aberystwyth; Ysbyty Glangwili yng Nghaerfyrddin; Ysbyty Tywysog Philip yn Llanelli; ac Ysbyty Llwynhelyg yn Hwlffordd
• Pum ysbyty cymunedol: Ysbytai Dyffryn Aman a Llanymddyfri yn Sir Gâr; Ysbyty Tregaron yng Ngheredigion; ac Ysbytai Dinbych y Pysgod a De Sir Benfro yn Sir Benfro
• Dau ganolfan gofal integredig: Aberaeron ac Aberteifi yng Ngheredigion; a nifer o safleoedd cymunedol arall
• 47 o bractisiau cyffredinol (chwech ohonynt a rheolir gan y Bwrdd Iechyd); practisau deintyddol (gan gynnwys pedwar orthodontig); 99 o fferyllfeydd cymunedol; 43 o bractisau offthalmig cyffredinol; ac 8 o ddarparwyr offthalmig cartref
• Lleoliadau niferus yn darparu gwasanaethau iechyd meddwl ac anableddau dysgu