HealthJobsUK

Trosolwg o'r swydd

Ydych chi’n gyfieithydd profiadol? Ydych chi’n chwilio am sialens newydd? Mae Iechyd Cyhoeddus Cymru yn dymuno penodi Cydlynydd Cyfieithu i ymuno â Thîm y Gymraeg i reoli a chydlynu gwasanaeth cyfieithu ar gyfer y sefydliad.

Mae hwn yn gyfle cyffrous i unigolyn â phrofiad cyfieithu gefnogi’r sefydliad i weithredu’n ddwyieithog, cynnig gwasanaeth Cymraeg o'r safon uchaf i'n cwsmeriaid a chyflawni nodau Safonau’r Gymraeg.

Disgwylir i'r Cydlynydd Cyfieithu weithio'n effeithiol gyda chydweithwyr ar draws y sefydliad i reoli gwaith cyfieithu a gweithio'n agos ac yn broffesiynol gyda chyflenwyr cyfieithu allanol i reoli contractau a goruchwylio gwaith a ddychwelir.  Bydd deiliad y swydd hefyd yn gallu darparu gwasanaeth cyfieithu o'r Gymraeg i'r Saesneg ac o'r Saesneg i'r Gymraeg yn ôl y galw. 

Mae hyblygrwydd o ran yr union batrwm gweithio, ac mae’r swydd yn addas ar gyfer gweithio’n rhannol o gartref.

Os hoffech ymuno â'n tîm ymroddedig a bod gennych brofiad a chymwysterau i gyd-fynd â'r swydd-ddisgrifiad, gwnewch gais am y swydd.

Bydd gan ddeilydd y swydd sgiliau rhugl yn y Gymraeg a'r Saesneg.

Prif ddyletswyddau'r swydd

CRYNODEB / DIBEN Y SWYDD:

Bydd deiliad y swydd yn rheoli a darparu gwasanaeth cyfieithu arbenigol o'r Saesneg i'r Gymraeg ac o’r  Gymraeg i’r Saesneg i alluogi'r Ymddiriedolaeth i weithredu'r egwyddor ei bod yn trin y Gymraeg a'r Saesneg yn gyfartal. Bydd deiliad y swydd yn arwain ar weithredu rhaglen gyflawni gynhwysfawr ar gyfer gwasanaethau cyfieithu’r Ymddiriedolaeth, gan gymryd agwedd strategol ragweithiol i sicrhau cydymffurfiaeth â Safonau’r Gymraeg o dan Fesur y Gymraeg (Cymru) 2011.

Bydd deiliad y swydd yn sicrhau bod yr Ymddiriedolaeth yn rhoi system newid gynhwysfawr ar waith i ddarparu ei wasanaeth cyfieithu yn llwyddiannus. Bydd deiliad y swydd yn darparu arweiniad strategol ar wella gwasanaethau cyfieithu, gan sicrhau bod dangosyddion perfformiad yn cael eu cynnal, ac yn mynd i'r afael ag unrhyw ddiffygion.

Bydd deiliad y swydd yn bwynt cyswllt cyntaf ar gyfer pob ymholiad yn ymwneud â chyfieithu a chyfieithu ar y pryd yn Gymraeg a bydd yn gweithio'n agos gyda'n holl ddarparwyr cyfieithu dan gontract.  Bydd deiliad y swydd yn defnyddio ei wybodaeth hynod arbenigol i ddarparu rôl arweiniol wrth weithredu a datblygu parhaus system a swyddogaeth gyfieithu'r Ymddiriedolaeth, gan gynnwys adolygu effeithiolrwydd y broses a’r canlyniadau yn rheolaidd. Bydd deiliad y swydd hefyd yn gyfrifol am nodi a gweithredu mesurau gwella a datblygu.

Gweithio i'n sefydliad

Ni yw Iechyd Cyhoeddus Cymru - asiantaeth iechyd cyhoeddus genedlaethol Cymru. Ein diben yw ‘gweithio gyda'n gilydd ar gyfer Cymru iachach'. Rydym yn bodoli i helpu pawb yng Nghymru i fyw bywydau hirach, iachach. Gyda'n partneriaid, ein nod yw cynyddu disgwyliad oes iach, gwella iechyd a llesiant, a lleihau anghydraddoldebau i bawb yng Nghymru, nawr ac ar gyfer cenedlaethau'r dyfodol. 

Gyda'i gilydd, mae ein timau'n gweithio i atal clefyd, diogelu iechyd, a darparu arweinyddiaeth, gwasanaethau arbenigol ac arbenigedd iechyd cyhoeddus. Ni yw'r brif ffynhonnell o wybodaeth, ymchwil ac arloesedd iechyd cyhoeddus yng Nghymru. Nid yw iechyd cyhoeddus erioed wedi bod mor bwysig wrth i ni ddod drwy bandemig y Coronafeirws, wynebu heriau'r argyfwng costau byw a mynd i'r afael ac atal effeithiau niweidiol newid hinsawdd.

Caiff ein sefydliad ei arwain gan ein gwerthoedd 'Cydweithio, gydag ymddiriedaeth a pharch, i wneud gwahaniaeth'. Rydym wedi ymrwymo i greu gweithle cynhwysol sy'n rhoi gwerth ar gydraddoldeb, amrywiaeth a chynhwysiant.  Rydym yn croesawu ceisiadau sy'n cynrychioli amrywiaeth gyfoethog y cymunedau rydym yn eu gwasanaethu a chan y rhai sy'n dymuno gweithio'n rhan amser neu rannu swydd.

I ddarganfod mwy am weithio i ni a'r buddion rydym yn eu cynnig, ewch i Gyrfaoedd - Iechyd Cyhoeddus Cymru (gig.cymru)

I gael arweiniad ar y broses ymgeisio, ewch i Gwybodaeth a Chanllawiau i Ymgeiswyr - Iechyd Cyhoeddus Cymru (gig.cymru)