Trosolwg o'r swydd

Mae Bwrdd Iechyd Prifysgol Hywel Dda yn chwilio am arweinydd cyllid eithriadol i ymuno â’i Gyfarwyddiaeth Cyllid yn rôl Cyfarwyddwr Cynorthwyol Cyllid, Cyfrifyddu a Chyfalaf.

Bydd y cyfle uwch-arweinyddiaeth proffil uchel hwn yn apelio at weithwyr proffesiynol uchelgeisiol a phrofiadol o’r GIG, y sector cyhoeddus ehangach, meysydd archwilio, seilwaith, a diwydiannau reoledig neu amgylcheddau corfforaethol cymhleth sy’n dymuno cael effaith ystyrlon mewn sefydliad gwasanaeth cyhoeddus mawr ac amrywiol.

Mewn partneriaeth â’r Dirprwy Gyfarwyddwr Cyllid, Sicrwydd Ariannol, byddwch yn arwain swyddogaethau cyfrifyddu ariannol, cyfrifon statudol, cyllid cyfalaf, llywodraethu a rheoli y Bwrdd Iechyd. A chithau’n gynghorydd dibynadwy i Gyfarwyddwyr Gweithredol Pwyllgorau’r Bwrdd a rhanddeiliaid allweddol, byddwch yn chwarae rhan hanfodol wrth sicrhau bod gwybodaeth ariannol, sicrwydd ac argymhellion yn graff, yn gadarn ac yn amserol, gan gefnogi’r broses o wneud penderfyniadau ar y lefel uchaf.

Mae hwn yn gyfle gwerth chweil i lunio dyfodol stiwardiaeth ariannol yn un o sefydliadau GIG mwyaf Cymru, gan lywio gwelliannau i drefniadau llywodraethu ariannol, cryfhau prosesau craidd, a chefnogi rhaglenni buddsoddi cyfalaf uchelgeisiol a fydd yn fanteisiol i’n cymunedau am genedlaethau i ddod. Byddwch yn arwain ac yn ysbrydoli timau perfformiad uchel, yn hyrwyddo gwelliant parhaus, ac yn cyfrannu at ddarparu gwasanaeth gofal iechyd o ansawdd uchel ledled Gorllewin Cymru. 

Prif ddyletswyddau'r swydd

Byddwch yn chwarae rhan allweddol wrth ddarparu trefniadau cyfrifyddu ac adrodd ariannol statudol o ansawdd uchel, ynghyd â fframweithiau rheoli ariannol mewnol, gan fod yn arweinydd cyllid uwch ar gyfer archwiliadau. Gan weithio’n agos gyda chyd-weithwyr ledled y sefydliad, byddwch yn helpu i drosi canfyddiadau sicrwydd yn welliannau ystyrlon a chynaliadwy sy’n cryfhau ein trefniadau llywodraethu ariannol ac yn cefnogi gwell canlyniadau.

Gan bartneru â thimau ar draws y gwasanaethau Ystadau, Digidol, gweithredol a chlinigol, byddwch yn arwain y cyfraniad cyllid i raglenni cyfalaf a phenderfyniadau buddsoddi mawr. O lunio achosion busnes a chynlluniau cyfalaf hirdymor, i oruchwylio trefniadau adrodd ariannol, rhagfynegi a rheoli asedau, byddwch yn helpu i sicrhau bod buddsoddiad yn cyflawni’r budd mwyaf i’n cleifion, ein cymunedau, ein gweithlu a threthdalwyr.

Agwedd bwysig ar y rôl hon fydd llywio arloesedd a gwelliant parhaus ar draws y prosesau cyllid, gan ddefnyddio datrysiadau digidol, awtomeiddio, a data o ansawdd uchel i wella effeithlonrwydd, mewnwelediad a’r broses gwneud penderfyniadau. A chithau’n uwch-arweinydd yn y Gyfarwyddiaeth Gyllid, byddwch yn ysbrydoli ac yn datblygu timau arbenigol, yn meithrin perthnasoedd cadarn â chyd-weithwyr a phartneriaid, ac yn darparu cyngor dibynadwy ar faterion cyllid cymhleth, o werth uchel, gan helpu i lunio dyfodol gofal iechyd ar hyd a lled Hywel Dda.

Gweithio i'n sefydliad

Mae Bwrdd Iechyd Prifysgol Hywel Dda yn darparu gwasanaethau gofal iechyd GIG i bobl sy’n byw yn Sir Gâr, Sir Benfro a Cheredigion, a siroedd sy’n ffinio.

Mae gennym dros 13,000 o staff a gyda’n gilydd rydym yn darparu gwasanaethau cynradd, cymuned, yn yr ysbyty, iechyd meddwl ac anghenion dysgu.

Gweithiwn mewn partneriaeth gyda’r tri awdurdod lleol, yn ogystal â chydweithwyr cyhoeddus, preifat a trydydd sector, a hefyd ein tîm o wirfoddolwyr gwerthfawr.

Darperir ein gwasanaethau yn:

• Pedwar prif ysbyty: Ysbyty Bronglais yn Aberystwyth; Ysbyty Glangwili yng Nghaerfyrddin; Ysbyty Tywysog Philip yn Llanelli; ac Ysbyty Llwynhelyg yn Hwlffordd
• Pum ysbyty cymunedol: Ysbytai Dyffryn Aman a Llanymddyfri yn Sir Gâr; Ysbyty Tregaron yng Ngheredigion; ac Ysbytai Dinbych y Pysgod a De Sir Benfro yn Sir Benfro
• Dau ganolfan gofal integredig: Aberaeron ac Aberteifi yng Ngheredigion; a nifer o safleoedd cymunedol arall
• 47 o bractisiau cyffredinol (chwech ohonynt a rheolir gan y Bwrdd Iechyd); practisau deintyddol (gan gynnwys pedwar orthodontig); 99 o fferyllfeydd cymunedol; 43 o bractisau offthalmig cyffredinol; ac 8 o ddarparwyr offthalmig cartref
• Lleoliadau niferus yn darparu gwasanaethau iechyd meddwl ac anableddau dysgu