Trosolwg o'r swydd

Rydym yn chwilio am unigolyn talentog sy'n awyddus i ddysgu a bod yn aelod rhagweithiol o'r tîm Wroleg yn Hywel Dda. Rhaid i chi fod yn hyderus, a gallu amlygu sgiliau cyfathrebu llafar, ysgrifenedig a TG rhagorol, yn ogystal â sgiliau trefnu a chynllunio da.

Yn y rôl werth chweil hon, byddwch yn gweithio'n agos gyda'n nyrsys clinigol arbenigol, ein meddygon ymgynghorol, a'r tîm amlddisgyblaethol ehangach, a hynny i gefnogi'r gwaith o ddarparu gofal diogel, effeithiol, sy'n canolbwyntio ar y claf ledled amrywiaeth o leoliadau cleifion allanol a lleoliadau diagnostig. Mae hwn yn gyfle gwych i rywun sy'n ymrwymedig i ragoriaeth broffesiynol ac yn awyddus i chwarae rhan hanfodol wrth wella profiad y claf mewn gwasanaeth arloesol sy'n tyfu.

Mae rôl yr Ymarferydd Cynorthwyol yn hanfodol wrth gefnogi gofal diogel a holistaidd ein cleifion, ac mae'n golygu darparu cyngor wyneb yn wyneb a dros y ffôn i gleifion, teuluoedd a gofalwyr. Dan oruchwyliaeth y Tîm Nyrsys Arbenigol Clinigol Wroleg, bydd yr unigolyn hwn hefyd yn gyfrifol am ddarparu cymorth dilynol i gleifion a theuluoedd sy'n byw ar ôl triniaeth neu â diagnosis o ganser. Bydd hyn yn golygu cyfeirio at 
wasanaethau eraill yn yr ysbyty a'r gymuned.

Prif ddyletswyddau'r swydd

Gwybodaeth, Addysg a Chymorth i Gleifion

• Darparu esboniadau clir, tosturiol o brofion, triniaethau, a phrosesau'r clinig.
• Cynnig cysur a chyngor ymarferol, a chyfeirio at wasanaethau neu adnoddau arbenigol.
• Cefnogi cleifion sy'n byw â chyflyrau wroleg, yn cynnwys y rheiny sy'n destun llwybrau canser a llwybrau cyflyrau hirdymor.

Dogfennaeth Glinigol a Dyletswyddau Gweinyddol

• Diweddaru cofnodion electronig cleifion yn gywir, cofnodi asesiadau, arsylwadau, a chanlyniadau.
• Cefnogi'r gwaith o reoli llif clinigau ac apwyntiadau, a chydlynu â chyd-weithwyr amlddisgyblaethol.
• Cynorthwyo i fonitro lefel y stoc, cynnal a chadw cyfarpar, ac archebu cyflenwadau.

Asesiadau Cleifion a Chymorth Clinigol

• Cynnal asesiadau clinigol, arsylwadau, ac adolygiadau holistaidd dirprwyedig dan oruchwyliaeth ymarferydd cofrestredig.
• Paratoi cleifion ar gyfer amrywiaeth o driniaethau wroleg i gleifion allanol (e.e. profion cyfradd llif, sganiau o'r bledren, asesiad cyn cystosgopi hyblyg, clinigau asesu'r prostad)

Profi Diagnostig a Gweithdrefnau Clinigol

• Cynnal a chofnodi mesuriadau megis mesur llif wrin, sganio'r bledren am weddillion ar ôl gwacáu, profion wrin, a phrofion pwynt gofal eraill.
• Cynorthwyo clinigwyr cofrestredig yn ystod archwiliadau a mân driniaethau, gan sicrhau esmwythdra, urddas, a diogelwch y claf.
• Paratoi ardaloedd, cyfarpar, ac offer clinigol yn unol â safonau atal a rheoli haint.

Gweithio i'n sefydliad

Mae Bwrdd Iechyd Prifysgol Hywel Dda yn darparu gwasanaethau gofal iechyd GIG i bobl sy’n byw yn Sir Gâr, Sir Benfro a Cheredigion, a siroedd sy’n ffinio.

Mae gennym dros 13,000 o staff a gyda’n gilydd rydym yn darparu gwasanaethau cynradd, cymuned, yn yr ysbyty, iechyd meddwl ac anghenion dysgu.

Gweithiwn mewn partneriaeth gyda’r tri awdurdod lleol, yn ogystal â chydweithwyr cyhoeddus, preifat a trydydd sector, a hefyd ein tîm o wirfoddolwyr gwerthfawr.

Darperir ein gwasanaethau yn:

• Pedwar prif ysbyty: Ysbyty Bronglais yn Aberystwyth; Ysbyty Glangwili yng Nghaerfyrddin; Ysbyty Tywysog Philip yn Llanelli; ac Ysbyty Llwynhelyg yn Hwlffordd
• Pum ysbyty cymunedol: Ysbytai Dyffryn Aman a Llanymddyfri yn Sir Gâr; Ysbyty Tregaron yng Ngheredigion; ac Ysbytai Dinbych y Pysgod a De Sir Benfro yn Sir Benfro
• Dau ganolfan gofal integredig: Aberaeron ac Aberteifi yng Ngheredigion; a nifer o safleoedd cymunedol arall
• 47 o bractisiau cyffredinol (chwech ohonynt a rheolir gan y Bwrdd Iechyd); practisau deintyddol (gan gynnwys pedwar orthodontig); 99 o fferyllfeydd cymunedol; 43 o bractisau offthalmig cyffredinol; ac 8 o ddarparwyr offthalmig cartref
• Lleoliadau niferus yn darparu gwasanaethau iechyd meddwl ac anableddau dysgu