Trosolwg o'r swydd

Mae gennym gyfle gwych i fferyllydd brwdfrydig arwain strategaeth y stiwardiaeth wrthficrobaidd yn Ysbyty'r Tywysog Philip, cyfle a fydd yn caniatáu i ddeiliad y swydd wneud gwahaniaeth gwirioneddol i ymwrthedd gwrthficrobaidd.

Rydym yn chwilio am Fferyllydd uchel ei gymhelliant sy'n meddu ar sgiliau cyfathrebu, rhyngbersonol a rheoli amser rhagorol.

Gan weithio'n agos gyda chleifion a'r tîm amlddisgyblaethol, bydd angen i chi fod yn frwdfrydig a meddu ar sgiliau ardderchog o ran gweithio mewn tîm a negodi. Rydym yn chwilio am unigolyn a all weithio'n annibynnol ac sy'n meddu ar sgiliau blaenoriaethu rhagorol, ynghyd â'r gallu i ddefnyddio ei fenter. 

Rhaid i ymgeiswyr fod wedi'u cofrestru yn fferyllwyr gyda'r Cyngor Fferyllol Cyffredinol, a dylent fod wedi cwblhau Diploma mewn Fferylliaeth Glinigol (neu gymhwyster cyfatebol).

Rydym yn dîm blaengar sy’n canolbwyntio ar y claf ac yn cydweithio’n agos gyda’r timau amlddisgyblaethol i wella diogelwch cleifion trwy roi cyngor proffesiynol i bresgripsiynwyr, cynllunio ar gyfer rhyddhau cleifion, a mynychu rowndiau wardiau dan arweiniad meddygon ymgynghorol. Mae datblygiad proffesiynol o'r pwys mwyaf, a darperir cymorth a hyfforddiant. 

Prif ddyletswyddau'r swydd

Gan weithio gyda'r Tîm Rheoli Meddyginiaethau, Microbiolegwyr Ymgynghorol a Fferyllwyr Gwrthficrobaidd eraill y Bwrdd Iechyd, byddwch yn helpu i ddarparu stiwardiaeth wrthficrobaidd ledled yr ysbyty.

Byddwch yn helpu i gyflawni'r uchelgeisiau hyn trwy ddefnyddio nifer o fentrau ac ymyriadau, yn cynnwys archwiliadau ac adborth lleol a chenedlaethol; cyfrannu at ganllawiau rhagnodi gwrthficrobaidd lleol a chenedlaethol, a'u rhoi ar waith; gweithio tuag at gyflawni targedau Llywodraeth Cymru; a chefnogi'r gwaith o addysgu a hyfforddi gweithwyr gofal iechyd mewn stiwardiaeth wrthficrobaidd.

Bydd oddeutu hanner yr amser yn cael ei dreulio ar ddyletswyddau sy'n gysylltiedig â gwrthfiotigau, a'r hanner arall ar ddyletswyddau clinigol eraill. Byddwch yn gweithio gyda'r tîm amlddisgyblaethol yn monitro gwarant ariannol ac yn ymgymryd ag ymchwil a phrosiectau gwella gwasanaethau, ochr yn ochr â chefnogi'r gwasanaethau fferyllol craidd yn y ddosbarthfa ac ar y wardiau. 

Yn rôl Uwch-fferyllydd, byddwch yn gyfrifol am gydgysylltu a darparu gwasanaeth fferyllol clinigol sy'n canolbwyntio ar y claf. Bydd yr ymgeisydd llwyddiannus yn gweithio ar wardiau meddygol cyffredinol yn datblygu ei rôl fferyllydd, a hynny gyda'r posibilrwydd o ddatblygu i fod yn Fferyllydd Annibynnol mewn clinigau dan arweiniad fferyllydd. 

Bydd gofyn i ymgeiswyr gymryd rhan yn y rota penwythnos ac ar alwad

Gweithio i'n sefydliad

Mae Bwrdd Iechyd Prifysgol Hywel Dda yn darparu gwasanaethau gofal iechyd GIG i bobl sy’n byw yn Sir Gâr, Sir Benfro a Cheredigion, a siroedd sy’n ffinio. 

Mae gennym dros 13,000 o staff a gyda’n gilydd rydym yn darparu gwasanaethau cynradd, cymuned, yn yr ysbyty, iechyd meddwl ac anghenion dysgu.

Gweithiwn mewn partneriaeth gyda’r tri awdurdod lleol, yn ogystal â chydweithwyr cyhoeddus, preifat a trydydd sector, a hefyd ein tîm o wirfoddolwyr gwerthfawr.

Darperir ein gwasanaethau yn:

• Pedwar prif ysbyty: Ysbyty Bronglais yn Aberystwyth; Ysbyty Glangwili yng Nghaerfyrddin; Ysbyty Tywysog Philip yn Llanelli; ac Ysbyty Llwynhelyg yn Hwlffordd 
• Pum ysbyty cymunedol: Ysbytai Dyffryn Aman a Llanymddyfri yn Sir Gâr; Ysbyty Tregaron yng Ngheredigion; ac Ysbytai Dinbych y Pysgod a De Sir Benfro yn Sir Benfro ·
• Dau ganolfan gofal integredig: Aberaeron ac Aberteifi yng Ngheredigion; a nifer o safleoedd cymunedol arall 
• 47 o bractisiau cyffredinol (chwech ohonynt a rheolir gan y Bwrdd Iechyd); practisau deintyddol (gan gynnwys pedwar orthodontig); 99 o fferyllfeydd cymunedol; 43 o bractisau offthalmig cyffredinol; ac 8 o ddarparwyr offthalmig cartref 
• Lleoliadau niferus yn darparu gwasanaethau iechyd meddwl ac anableddau dysgu