Trosolwg o'r swydd

Mae Bwrdd Iechyd Hywel Dda yn cyflwyno cyfle cyffrous i Ffisiotherapydd llawn cymhelliant a phrofiadol ymuno â'n tîm sydd wedi ennill Gwobrau gan y GIG ac Iechyd Cyhoeddus, sef y “Tîm Cartref yn Gyntaf,” (Gwasanaethau Gofal Canolraddol) yn Sir Gaerfyrddin. 

https://phw.nhs.wales/services-and-teams/improvement-cymru/improvement-cymru-academy/nhs-wales-awards/2022/2-delivering/hduhb-mdt-carmarthenshire/

Dyma ddolen i fideo o'n ffisiotherapyddion o fewn y tîm, yn adrodd eu stori a'u profiad o weithio yn ein tîm:-

https://youtu.be/UJv5vqEO748?si=I5bJhYLjimkeYcBH

Rydym yn dîm arloesol, cynhwysfawr o Ffisiotherapyddion, Therapyddion Galwedigaethol, Ymarferwyr Cynorthwyol Therapi, Deietegwyr, Nyrsys, Meddygon Teulu, Uwch-ymarferwyr Parafeddygol, Uwch-ymarferwyr Nyrsio, Cymdeithion Meddygol, Gweithwyr Cymdeithasol, Uwch-weithwyr Ailalluogi ac Asiantau Trydydd Sector sy'n ymdrechu i ddarparu'r cymorth iawn, ar yr adeg iawn, yn y lle iawn mor agos i gartref â phosibl.

Bydd y rolau hyn yn rhan o’r Tîm Amlddisgyblaethol “Cartref yn Gyntaf”, sy'n cydweithio i ddarparu ymyriadau cynnar a chyfnodau o adsefydlu ac asesu yn y gymuned er mwyn lliniaru ar unwaith effeithiau unrhyw weithrediad a gollir, y risg o ddadgyflyru, diffyg maeth, a dirywiad mewn iechyd meddwl pobl, a hynny i gynyddu'r amser y byddant yn ei 
dreulio gartref yn hytrach nag yn yr ysbyty. 

Prif ddyletswyddau'r swydd

Ein ffordd o weithredu yw darparu gofal cleifion mewn modd holistaidd sy’n canolbwyntio ar yr unigolyn, gan gefnogi cleifion, pan fo’n bosibl, i aros/dychwelyd mewn modd diogel i’w cartrefi eu hunain lle gallant barhau i fod yn aelodau gwerthfawr o’u cymuned eu hunain.

A chithau'n unigolyn ôl-raddedig amryddawn, bydd gennych sylfaen glinigol gadarn ym maes adsefydlu pobl hŷn, arbenigedd o ran syndrom eiddilwch, cyflyrau niwrolegol, cyflyrau cardio-anadlol a phroblemau cyhyrysgerbydol, a dealltwriaeth dda o faterion cyfredol sy'n effeithio ar ofal canolraddol a gwasanaethau cymunedol.

Bydd yn ofynnol i ymgeiswyr llwyddiannus feddu ar allu rhagorol i weithio'n annibynnol, gan reoli a blaenoriaethu llwyth achosion amrywiol ac anrhagweladwy. Bydd hefyd yn ofynnol i chi feddu ar y gallu i addasu i amgylchedd sy'n newid yn gyflym ac sydd dan bwysau, a hynny ochr yn ochr ag aelodau'r tîm amlddisgyblaethol. Disgwylir i ddeiliaid y swyddi gefnogi a goruchwylio staff Ffisiotherapi iau, Technegwyr Ffisiotherapi, Cynorthwywyr Ailalluogi/Gweithwyr Cymorth Eiddilwch a myfyrwyr.

Mae hwn yn gyfle cyffrous i unigolyn brwdfrydig, sy'n teimlo'n angerddol ynghylch gwerth ffisiotherapi cymunedol, gynnal momentwm wrth drawsnewid ein gwasanaethau cymunedol ledled sefydliadau er budd pobl Sir Gaerfyrddin a chenedlaethau'r dyfodol. 

Gweithio i'n sefydliad

Mae Bwrdd Iechyd Prifysgol Hywel Dda yn darparu gwasanaethau gofal iechyd GIG i bobl sy’n byw yn Sir Gâr, Sir Benfro a Cheredigion, a siroedd sy’n ffinio.

Mae gennym dros 13,000 o staff a gyda’n gilydd rydym yn darparu gwasanaethau cynradd, cymuned, yn yr ysbyty, iechyd meddwl ac anghenion dysgu.

Gweithiwn mewn partneriaeth gyda’r tri awdurdod lleol, yn ogystal â chydweithwyr cyhoeddus, preifat a trydydd sector, a hefyd ein tîm o wirfoddolwyr gwerthfawr.

Darperir ein gwasanaethau yn:

• Pedwar prif ysbyty: Ysbyty Bronglais yn Aberystwyth; Ysbyty Glangwili yng Nghaerfyrddin; Ysbyty Tywysog Philip yn Llanelli; ac Ysbyty Llwynhelyg yn Hwlffordd
• Pum ysbyty cymunedol: Ysbytai Dyffryn Aman a Llanymddyfri yn Sir Gâr; Ysbyty Tregaron yng Ngheredigion; ac Ysbytai Dinbych y Pysgod a De Sir Benfro yn Sir Benfro
• Dau ganolfan gofal integredig: Aberaeron ac Aberteifi yng Ngheredigion; a nifer o safleoedd cymunedol arall
• 47 o bractisiau cyffredinol (chwech ohonynt a rheolir gan y Bwrdd Iechyd); practisau deintyddol (gan gynnwys pedwar orthodontig); 99 o fferyllfeydd cymunedol; 43 o bractisau offthalmig cyffredinol; ac 8 o ddarparwyr offthalmig cartref
• Lleoliadau niferus yn darparu gwasanaethau iechyd meddwl ac anableddau dysgu