Trosolwg o'r swydd

Mae Bwrdd Iechyd Prifysgol Betsi Cadwaladr yn awyddus i benodi dau Ddermatolegydd Ymgynghorol Locwm llawn amser i gael eu lleoli naill ai yn Ysbyty Maelor Wrecsam neu yn Ysbyty Glan Clwyd. 

Mae'r swyddi'n cynnwys deg sesiwn yr wythnos, y bydd wyth o'r rhain yn cynnig Gofal Clinigol Uniongyrchol (DCC) a dwy ar gyfer Gweithgarwch Proffesiynol Ategol (SPA) fel arfer. Efallai y caiff gwaith rhan-amser / hyblyg ei ystyried fesul achos yn dilyn trafod gyda'r Arweinydd Clinigol a Chyfarwyddwr Meddygol yr Uwch Adran.

Mae disgwyliad i weld cymysgedd achosion o ddermatoleg gyffredinol a chanser y croen ym maes oedolion yn unol ag anghenion y gwasanaeth.

Ar hyn o bryd, mae'r adran yn cynnal Clinigau Teleddermatoleg, ac efallai y bydd ymgeiswyr addas yn gallu ymgymryd â chlinigau Teleddermatoleg fel rhan o weithgareddau gofal clinigol uniongyrchol sydd wedi'u rhaglennu yn unol ag anghenion y gwasanaeth.

Prif ddyletswyddau'r swydd

Darparu gwasanaethau dermatoleg ar gyfer cleifion allanol ar y cyd â chydweithwyr nyrsio a meddygol.

Cynnig gofal dermatolegol i gleifion mewnol a rhoi cyngor arbenigol i gleifion mewnol fel rhan o ddarpariaeth staff ym maes dermatoleg acíwt.

Rhannu cyfrifoldeb o ran safonau proffesiynol a rheoli ansawdd o fewn gwasanaethau dermatoleg gan sicrhau cydymffurfiaeth â safonau sy'n bodloni dulliau llywodraethu clinigol.

Datblygu'r gwasanaeth dermatolegol gyda chydweithwyr ymgynghorol eraill er mwyn cydnabod canllawiau rhanbarthol a chenedlaethol lle bo hynny'n briodol.

Rhannu'r cyfrifoldeb o gyflenwi mewn achosion brys yn absenoldeb astudio/gwyliau blynyddol neu salwch cydweithwyr.

Datblygu a gweithredu rhaglenni archwilio clinigol yn yr Adrannau Dermatoleg a chan gydweithio â grwpiau clinigol eraill.

Cymryd rhan mewn arfarniad blynyddol ar gyfer meddygon ymgynghorol.

Cyfrannu at ddatblygu gwasanaeth a phrosesau cynllunio busnes ar y cyd â chydweithwyr ymgynghorol eraill a'r gymuned iechyd ehangach.

Cynnig cyfleoedd hyfforddi i israddedigion ac ôl-raddedigion ym maes dermatoleg.

Rhaid i'r ymgeisydd llwyddiannus fod ag ymrwymiad i ailddilysu, archwilio meddygol a datblygiad proffesiynol parhaus.

Gweithio i'n sefydliad

Bwrdd Iechyd Prifysgol Betsi Cadwaladr (BIPBC) yw’r sefydliad iechyd mwyaf yng Nghymru, ac mae ganddo gyllideb gwerth mwy nag £2.4 biliwn ac mae'n cyflogi mwy na 20,000 aelod o staff yn ei weithlu.

Mae BIPBC yn darparu ystod lawn o wasanaethau sylfaenol, cymunedol, iechyd meddwl a gwasanaethau ysbytai acíwt ac arbenigol mewn 3 ysbyty acíwt, 22 ysbyty cymunedol a rhwydwaith o ganolfannau iechyd, clinigau, canolfannau timau iechyd yn y gymuned ac unedau iechyd meddwl. Mae hefyd yn cydlynu neu’n darparu gwaith practisau meddygon teulu a gwasanaethau’r GIG a ddarperir gan ddeintyddion, optegwyr a fferyllwyr ar draws y rhanbarth.

Mae'r Bwrdd Iechyd yn system iechyd integredig sy'n ymdrechu i ddarparu gofal tosturiol rhagorol gan gydweithio â'r sector cyhoeddus a sefydliadau statudol eraill, a sefydliadau yn y trydydd sector.

Mwynhewch fod yn rhan o weithio gydag arweiniad ymroddedig ar bob lefel, a chael sicrwydd ein bod yn ymrwymo i hyrwyddo cydraddoldeb ac amrywiaeth, ac yn falch o groesawu ymgeiswyr o dan y cynllun "Cyflogwr Hyderus o ran Anabledd".

Gwiriwch eich cyfrif ebost yn rheolaidd. Bydd ymgeiswyr llwyddiannus yn cael yr holl ohebiaeth recriwtio drwy’r cyfeiriad ebost a gofrestrwyd ar y ffurflen gais.

Caniateir i geisiadau gael eu cyflwyno yn y Gymraeg. Ni fydd cais a gyflwynir yn y Gymraeg yn cael ei drin yn llai ffafriol na chais a gyflwynir yn Saesneg.