Trosolwg o'r swydd

Cyfunwch rôl ymgynghorol werth chweil â’r cyfle i fyw a gweithio yn un o’r rhannau harddaf o Gymru. Mae Bwrdd Iechyd Prifysgol Hywel Dda yn chwilio am Hematolegydd Ymgynghorol Locwm i ymuno â’n tîm Haematoleg cefnogol a blaengar, a hynny’n bennaf yn Ysbyty Glangwili yng Nghaerfyrddin gan gyfrannu at wasanaethau ledled y Bwrdd Iechyd.

Rydym yn chwilio am glinigydd ymroddedig a all gynnig arbenigedd ychwanegol i’n tîm sefydledig a helpu i ddatblygu gwasanaethau is-arbenigedd ymhellach ledled y rhanbarth. Mae’r rôl hon yn gyfle i gael effaith ystyrlon ar ofal cleifion wrth weithio o fewn gwasanaeth cydweithredol sy’n gwerthfawrogi arloesedd, datblygiad gwasanaethau a thwf proffesiynol. 

Mae ein tîm o saith meddyg ymgynghorol yn darparu gwasanaeth Hematoleg cynhwysfawr ar draws pedwar safle ysbyty yng Ngorllewin Cymru, gan ofalu am boblogaeth amrywiol o gleifion ar draws hematoleg falaen ac anfalaen. A chithau’n gweithio yn ein hysbyty acíwt mwyaf, cewch gefnogaeth gan dîm amlddisgyblaethol sy’n cynnwys cyd-weithwyr Ymgynghorol, Meddygon Arbenigol, Cymrodyr Clinigol, Nyrsys Arbenigol Clinigol Hematoleg a Fferyllwyr Hematoleg Arbenigol. 

Prif ddyletswyddau'r swydd

Ymarfer Clinigol 

Bydd yr ymgeisydd llwyddiannus yn darparu gofal o safon ar draws holl sbectrwm Hematoleg a bydd yn cael cyfle i ddatblygu a gwella diddordeb is-arbenigol ar draws y Bwrdd Iechyd. Gan weithio’n agos gyda chyd-weithwyr ymgynghorol, byddwch yn cyfrannu at ddatblygiad parhaus gwasanaethau is-arbenigedd ac yn cefnogi’r gwaith o ddarparu gofal modern, sy’n canolbwyntio ar y claf. 

Gofalu am Gleifion Mewnol 

Byddwch yn darparu mewnbwn Hematoleg arbenigol i gleifion mewnol ar draws y safle, gan weithio’n agos gyda thimau acíwt ac arbenigol i gefnogi’r gwaith o reoli cyflyrau hematolegol cymhleth. Mae’r rôl yn cyfrannu at addysg a datblygiad cyd-weithwyr meddygol ac yn cynnal cysylltiadau agos â’r Gwasanaeth Oncoleg Acíwt, sy’n cefnogi cleifion mewnol hematoleg ar draws y Bwrdd Iechyd.

Gwasanaethau Cleifion Allanol 

Mae’r swydd yn cymryd rhan mewn 3-4 clinig cleifion allanol yr wythnos, gyda hyblygrwydd i ymgorffori gweithgarwch is-arbenigol ychwanegol yn ddibynnol ar brofiad a gofynion y gwasanaeth. Am fod mwyfwy o gleifion yn dychwelyd o ganolfannau trydyddol i gael triniaeth barhaus ac ôl-ofal yn nes at y cartref, mae’r gwasanaeth Hematoleg lleol yn chwarae rhan hanfodol yn eu gofal parhaus. Caiff ymgyngoriadau dros y ffôn a rhithwir eu hannog yn frwd i wella hygyrchedd i gleifion ar draws ein cymunedau gwledig.

Gweithio i'n sefydliad

Mae Bwrdd Iechyd Prifysgol Hywel Dda yn darparu gwasanaethau gofal iechyd GIG i bobl sy’n byw yn Sir Gâr, Sir Benfro a Cheredigion, a siroedd sy’n ffinio. 

Mae gennym dros 13,000 o staff a gyda’n gilydd rydym yn darparu gwasanaethau cynradd, cymuned, yn yr ysbyty, iechyd meddwl ac anghenion dysgu. 

Gweithiwn mewn partneriaeth gyda’r tri awdurdod lleol, yn ogystal â chydweithwyr cyhoeddus, preifat a trydydd sector, a hefyd ein tîm o wirfoddolwyr gwerthfawr. 

Darperir ein gwasanaethau yn: 

• Pedwar prif ysbyty: Ysbyty Bronglais yn Aberystwyth; Ysbyty Glangwili yng Nghaerfyrddin; Ysbyty Tywysog Philip yn Llanelli; ac Ysbyty Llwynhelyg yn Hwlfford 
• Pum ysbyty cymunedol: Ysbytai Dyffryn Aman a Llanymddyfri yn Sir Gâr; Ysbyty Tregaron yng Ngheredigion; ac Ysbytai Dinbych y Pysgod a De Sir Benfro yn Sir Benfro 
• Dau ganolfan gofal integredig: Aberaeron ac Aberteifi yng Ngheredigion; a nifer o safleoedd cymunedol arall 
• 48 o bractisiau cyffredinol (chwech ohonynt a rheolir gan y Bwrdd Iechyd); practisau deintyddol (gan gynnwys pedwar orthodontig); 99 o fferyllfeydd cymunedol; 43 o bractisau offthalmig cyffredinol; ac 8 o ddarparwyr offthalmig cartre 
• Lleoliadau niferus yn darparu gwasanaethau iechyd meddwl ac anableddau dysgu